الأربعاء، يناير 19، 2011

سين وجيم ... وميم وصاد وره


حوار مع متشكك

س
ياعم خلينا كدا احسن انت شكلك عايش بره ومش هتخاف علي شئ انت يعني مش عارف لو حصل كدا البلد تلتينها حرميه هتتسرق ومش هيبقي فيها حاجه

ج
الحقيقة أنا عايش هنا وخايف طبعا من المجهول - لكن أحيانا بيكون المجهول بكل احتمالاته الجيدة والسيئة - أفضل من معلوم كل احتمالاته سيئة

س
بالعكس انا مش معاك وانت اكتر حد عارف ان بلدنا كلها غلابه وفقره هما دول اللي هيتعرو وهياخدو علي دماغهم وهيكونو ضحايا لاي حد عايز يصل للكرسي

ج
الكرسي كدا كدا حد حيقعد عليه أو قاعد عليه بالفعل - القضية هي - حيعمل إيه وهو قاعد - حيخدم الناس - ولا يدي مفتاح الكرار للحرامية الشطار

س
يااستاذ  انت اكتر حد تعرف ان مفيش حد في مصر بيخدم حد وشوية الحمايه دي من عند ربنا مش من عند حاكم ولا مسئول وابسط حاجه في الانتخابات تشوف الواحد وبعد كدا انسي

ج
بالعكس - مصر مليانة ناس كويسة جدا - المشكلة إن النظام مصمم لطرد العناصر الجيدة بالهجرة أو بالتهميش - ودفع أفسد العناصر لصنع القرار - البقاء للأفسد

لكن مصر ملياااانة خير وناس حلوة ومجدع وتساعد وتدل وتدفع وتعزم وتعمل موائد رحمن وبنوك طعام وغيره وغيره

هو فيه شعب في العالم زي الشعب المصري

شعب فاخر

شعب جميل

يستحق أحسن من كدا بكتير

هناك تعليقان (2):

holom10 يقول...

المُتشككين كتير ولكن اذا عُرف السبب بطل العجب أُستاذى العزيز فقد أنشئوا بداخل كل مواطن مصرى جدار فولاذى من الخوف والذى يعلو ويرتفع اكثر مع مجرد كل لحظة تفكير لنيل حُريتنا انه الجدار الذى تم بنائه فى كل مصرى مثبت بقوة بحديد عز الذى لا يقهر انه نفس الجدار بداخل كل متشكك نفس الجدار الذى جعل الحاكم نائم هانيء البال وهنا جاءت المفاجأة الفاجعة ألا وهى تونس هذه الثورة المباركة هزت عروشوهم اخلت بتوازنه قلقت منامه تونس لو لم تنجح فى إقلاع هذا الجدار الفولاذى فقد أحدثت ثقب عميق اعطتنا أمل ثقب نشتم منه الحرية ثقب ننظر به بعين كلها تفاؤل لعل تتحقق أمانينا وننول الحرية

Wael Nawara يقول...

عندك حق - أسوأ سجن - هو السجن اللي زرعوه ورووه وكبروه جوانا - اللي بيمشي معانا وينام معانا - ويحجب بينا وبين كل شيء حتى أحلامنا

My Page on Facebook

Wael Nawara on Facebook